Liwat nga nagpanindugan ang Filipino boxing legend kag former Senator nga si Manny Pacquiao nga indi upang ang iya nga edad agud makapasakop sa Paris Olympics sa 2024.
Ini kasunod sang kumpirmasyon halin sa Philippine Olympic Committee nga may ginpadala na nga formal request sa International Olympic Committee agud mangin eligible sa Olympiada ang nasambit nga eight-division world champion.
Photo: USA Today
Nagpasalamat ang 44-anyos nga boxing legend sa sini nga tikang, kag nagsiling nga nagapati siya nga indi balabag ang iya edad agud malab-ot ang iya handum nga makasuksok sang gold medal sa boksing sa Olympics.
Matandaan nga una na nga gin-ako ni Pacquiao nga antes pa man siya nangin pro-boxer kag nakilala sa bug-os nga kalibutan, nangin handum kag dumot niya nga makaupod sa national team sang Pilipinas kag makahampang sa Olympiada apang wala ini nahatagan sang tyansa.
Ginalauman nga maka-qualify si Pacquiao paagi sa universality rule apang limitado lamang sa lima ka babayi kag apat ka lalaki ang hatagan sang amo nga slot agud maka-direkta hampang sa Paris Summer Games.
Nagabug-at subong si Pacquiao sang 66 kgs kag pwede makapili sa 63.50 kgs ukon 71 kgs nga yara sa boxing program sa Paris.
As of press time, ang Tokyo Olympics middleweight bronze medalist nga si Eumir Felix Marcial pa lamang ang isahanon nga boksidor sang Pilipinas nga naka-qualify para sa 2024 Olympics matapos nakatungtong sa finals sa Asian Games sa Hangzhou, China.
