Lain nga kontra ang atubangon ni Pinoy boxing legend Manny Pacquiao sa iya palaabuton nga exhibition match sa Japan.
Suno sa organizers, indi na madayon ang three-round 68kg boxing bout sini batok kay Chihiro Suzuki sa Hulyo 28 sa Saitama Super Arena bangud nag-withdraw ang Japanese kasunod sang injury nga naangkon sa iya kamot.
Ginbulos ang isa ka Japanese mixed martial artist nga si Rukiya Anpo nga amo ang makasambuwa sang 45-anyos nga multiple world champion.
Matandaan nga una na nga ginkumpirma ni Pacquiao nga magluwas sa iya nga exhibition match, gina-istoryahan man subong ang iya comeback sa professional boxing kag ang posible nga world title fight.
Apisar wala pa sang petsa nga nahatag kun san-o ini matabo, ginsiling sang anay senador nga posible makaatubang sini ang American fighter nga si Mario Barrios para sa WBC welterweight world title sa hingapusan subong nga tuig.
Matandaan nga gin-anunsyo ni Pacquiao ang iya pag-retiro sa boksing antes ini nagpadalagan sa pagka-presidente sang Mayo 2022 nga eleksyon.
Sang Disyembre 2022, nagbalik siya sa ring sa isa ka exhibition match batok sa isa ka South Korean YouTuber.
