Ginpanginwala ni presidential aspirant Senator Manny Pacquiao ang alegasyon ni Presidente Rodrigo Duterte nga gulpi lang siya naglusot sa Malacañang agud lamang makaistorya ang presidente.
Suno sa senador, si 1Pacman Party-list Rep. Eric Pineda ang nagpahibalo sa iya nga mismo si Duterte ang nag-request para sa meeting kag natural man suno sa iya nga indi siya makasulod sa palasyo kun wala sang prior appointment.
Gin-assume sang senador nga imbitado siya sa Malacañang apang nakibot siya suno sa iya sang namangkot man ang presidente kun ano ang tuyo sang ila nga meeting.
Una na nga ginpahayag sang Malacañang nga si Senator Christopher “Bong” Go ang nag-request sa amo nga meeting kag sa amo nga pagsinapol, ginapahayag nga may malip-ot nga istoryahanay ang duha kag may natabo nga “renewal of friendship.”
Kun si Go naman ang pahambalon, ang kampo ni Pacquiao ang nag-request sa meeting sa presidente.
Nahibaluan nga nangin matunog ang away sa tunga nanday Pacquaio sang nagliligad pa nga mga bulan, sang gin-criticize sang senador ang polisa ni Duterte sa West Philippine Sea, ginbuyagyag ang pila ka ginaalegar kurapsyon sa Duterte administration, kag naglab-ot pa sa pagkatunga sang ruling party nga PDP-Laban sa duha ka faction.
