Duha na lang kaadlaw kag liwat na naman nga makit-an si eight division world champion Manny Pacquiao sa ibabaw sang boxing ring.
Bilog nga bulan man kuntani ang nangin preparasyon ni Pacquiao batuk sa American boxer nga si Errol Spence Jr. apang nag-withdraw ini bangud sa injury.
Napilitan ang boxing champ nga liwat nga tun-an ang hulag sang iya mangin kasumpong sa Agusto 22 nga si Cuban champion Yordenis Ugas.
Apang gin-ako ni Pacquiao nga may yara sang gamay nga kabudlay sa iya nga bahin samtang nagapreparar para kay Ugas — ang reigning “super” WBA welterweight king.
Antes ang adlaw sang hampang, masako ang boxing champ sa paglantaw sang mga away man sadto ni Ugas agud nga makuha ni Pacquiao ang estilo sang Cuban champion sa ibabaw sang boxing ring.
Sang ginpamangkot kun bala masarangan ni Pacquiao nga i-knockout si Ugas, sabat sang fighting senator, tinguhaan niya ini apang ang iya ginasiguro amo nga mangin malipayon ang boxing fans.
Hiwaton ang World Welterweight Championship sa Las Vegas, Nevada sa Estados Unidos.
