Nagapati ang kilala nga boxing analyst nga si Atty. Ed Tolentino nga kinahanglan magpangibabaw si 8-Division World Champion Manny Pacquiao sa mga una nga round sang iya kompetisyon kay Mario Barrios subong nga adlaw, Hulyo 20, agud may daku siya nga posibilidad nga magdaog.
Suno kay Tolentino, bisan ara gihapon kay Pacquiao ang kadasig kag kusog sang iya mga sumbag, indi na malikawan ang epekto sang edad nga posible magpabudlay sa iya performance sa ring.
Ginbuyagyag man sang analyst nga apat ka tuig nga nagpahuway si Pacquiao, samtang si Barrios nakasugata na sang mga bantog nga boksidor pareho kanday Gervonta Davis, Keith Thurman, kag Yordenis Ugas, nga amo man ang nagdaog batok sa iya paagi sa unanimous decision sang 2021.
Ginpunto ni Tolentino nga kinahanglan ipabatyag ni Pacquiao ang iya kusog sa umpisa pa lang, kag indi na pagpaabuton nga maglab-ot sa madugay nga mga round ang kompetisyon.
Ginpahanumdom man sang analyst ang iya kampo nga amligan ang mga tiil ni Pacquiao, ilabi na ang problema niya sa leg cramps, nga may daku nga epekto sa iya footwork, isa sa iya signature nga abilidad sa sulod sang masobra 70 ka mga laban.
