ILOILO CITY- Wala pa sang petsa ang pag-abot sang COVID-19 vaccines sa Western Visayas.
Sa interview sang Bombo Radyo kay Dr. Jane Juanico, head sang Infectious Disease Cluster sang Department of Health- Center for Health Development Region 6, iya ginpahayag nga may alokasyon na, apang wala pa sang data sang numero sang vaccine kag kon san-o ini ipadala sa rehiyon 6.
Suno kay Juanico, handa naman ang COVID referral facilities nga Western Visayas Medical Center sa Mandurriao, Iloilo City kag Corazon Locsin Montelibano Memorial Regional Hospital sa Bacolod City nga amo ang pagadal-an sang mga bakuna sa tion nga mag-abot ini sa rehiyon.
Pahayag niya, ang mga pasilidad naman nga hatagan sang bakuna santo sa rekomendasyon sang national office amo ang Western Visayas Medical Center sa Mandurriao kag Corazon Locsin Montelibano Memorial Regional Hospital, kag pagasundan sang level 3, level 2, kag level 1 hospitals.
Sa tion naman sang pagpatigayon sang vaccination, kinahanglan nga registered ang empleyado sa information system kag may consent for vaccination.
Tanan nga frontline health workers, apisar wala nagatrabaho sa amo nga ospital apang nagpalista sa amo nga ospital ang malakip man sa pagabakunahan.
Dugang pa niya, bangud targeted ang mga pabakunahan, wala sang matabo nga walk-in nga pagpabakuna.
Matapos matublok ang first dose, itublok ang second dose pagkatapos sang 28 ka adlaw.
