ILOILO – Nag-athaganay na ang Iloilo Provincial Government kag ang mga tiglawas sang vessel kag airline companies may kaangtanan sa pag-abot sang mga locally stranded individuals (LSIs) sa probinsya.
Ini ang kasunod sang pagsinapol nga ginhimo sang gobernador kaupod ang Philippine Ports Authority (PPA), Civil Aviation Authority of the Philippines, kag mga kompaniya sa air kag water transport sector.
Sa interview sang Bombo Radyo kay Iloilo Governor Arthur Defensor Jr., iya ginpahayag nga nahibaluan na sang mga tiglawas sang nasambit nga sektor “in principle” ang numero sang mga LSIs nga dapat pasudlon sa probinsya kada semana apang sa subong, wala pa sang napirmahan nga dokumento.
Ginkonsiderar suno sa gobernador ang kapasidad sang quarantine facilities sa kabanwahanan agud malikawan ang pagginutok.
Ginalauman man sang natungdan nga paagi sa sini nga plano, mangin mahapos na para sa mga local government units ang pagsugat sa mga LSIs nga magapauli sa ila banwa.
