ILOILO CITY – Indi malapawan sang ano man nga sahi sang premyo ang pag-abyanay sang Top 12 finalists sa The 3rd National Bombo Music Festival bisan nga natapos na ang grand performance night.
Sa programa Good Morning Philippines program, ginpahayag ni Francis Lazatin Jr. sang Baguio City kag composer sang ambahanon nga Kung Gusto Mo Ako, nga tuman ang iya nga pagpasalamat bangud paagi sa Bombo Music Festival, madamu siya sang nakilala nga mga composer kag singer nga may yara sang nagkalain-lain nga social status.
Suno kay Lazatin, first time niya nga nagpasakop sa national competition kag isa lang ang entry nga iya ginpasa rason nga tuman ang iya nga pagdayaw sa Bombo Music Festival.
Ginpahayag man ni Lazatin nga pagkatapos sang grand performance night, nahatagan siya sang inspirasyon sa pagbalay sang madamu nga ambahanon nga iya naman ipasakop sa masunod nga edisyon sang Bombo Music Festival kag bilang bulig sa pagtib-ong sa Original Pilipino Music.
Samtang suno naman kay Winset Rose Jacot sang Cagayan de Oro City, composer kag interpreter sang ambahanon nga Kung Mahal Mo
Siya, kasubong nga bonus na lang ang pagdaug sa kompetisyon bangud nga may yara na nga daan sang guaranteed prize ang tagsa ka finalist.
Magluwas sa premyo, ginpahayag ni Jacot nga indi mabatyagan nga may kompetisyon sa tunga nila nga mga finalist bangud nga ginasuportahan nila ang kada isa.
Sa pagkamatuod suno sa natungdan, sa backstage kadungan sang grand performance night, ila na lang nga ginapanumdom kun paano matigayon ang ila performance nga wala sang sala.
Kasubong nga throwback naman ang nangin performance sang interpreter sang ambahanon nga Babalik-Balikan nga ginbalay ni Niño Dela Pas Mas sang Las Piñas City.
Suno kay Dela Pas Mas, madugay man nga tion nga wala siya naka-perform kasubong sang yara pa siya sadto sa banda kaupod ang interpreter nga si Joel Sampot.
Ginpahayag ni Dela Paz Mas nga sa subong, nagatrabaho siya bilang graphic artist kag wala niya ginlauman nga malakip sa top 12 sang Bombo Music Festival ang iya ginhimo nga ambahanon.
Sa pangkabug-usan, gindayaw sang natungdan ang tanan nga finalist bangud para sa iya, tuman ka budlay ang pagpili sa kun sin-o ang magadaug sa kompetisyon.
