ILOILO CITY – Magapadayon ang pag-abyanay sang Ilonggo kag Chinese Community sa syudad sang Iloilo.
Ini ang ginpasalig ni Iloilo City Mayor Jerry Treñas kadungan sang pag-umpisa sang Chinese New Year celebration.
Sa interview sang Bombo Radyo kay Treñas, iya ginpahayag nga daku ang iya nga pagpasalamat sa Chinese Community nga nagbulig agud nga mapauswag ang ekonomiya sang syudad sang Iloilo.
Suno kay Treñas, full-support ang Iloilo City Government sa tuman ka daku nga selebrasyon sang Chinese New Year subong nga tuig.
Ginpahayag ni Treñas nga kinahanglan nga maghugpong ang Ilonggo-Chinese Community para sa kaayuhan sang syudad sang Iloilo.
Samtang, ginkalipay naman ni Dr. Felipe Uygongco, chairman sang Chinese New Year Task Force, ang pagsuporta sang Iloilo City Government sa Chinese Community.
Sa interview sang Bombo Radyo kay Uygongco, iya ginpahayag nga ang mga Ilonggo kag Chinese ang makabig nga mag-ulutod.
Suno kay Uygongco, humalin sang una, nagabuligay ang Ilonggo-Chinese Community rason nga kinahanglan ini nga mapadayon para sa ginahandum nga ‘Level-up Iloilo City’.
