ILOILO CITY – Indi makaapekto sa review sang Department of Justice sa kaso sang ginakabig mga drug lords nga sanday Kerwin Espinosa, Peter Lim kag iban pa, ang pamahog ni Presidente Rodrigo Duterte kay Justice Secretary Vitaliano Aguirre.
Sa interview sang Bombo Radyo Iloilo, ginpahayag ni Presidential Legal Counsel Atty. Salvador Panelo nga joke lang ang pahayag sang presidente nga kun makaguwa sa presuhan sanday Espinosa, iya igabulos sa presuhan si Sec. Aguirre.
Lahog lang ini sang presidente suno kay Panelo, nga masami man ginahimo sang Chief Executive sa iya mga abyan.
Paathag ni Atty. Panelo, mahimo nga baliskaron sang DoJ chief ang desisyon sang fiscal sa ginapatigayon nga automatic review.
Apisar mahina ang kaso suno kay Panelo, mahimo pa ini mapabaskog kun yara na sa trial kun sa diin mahimo magdugang sang mga ebidensiya.
Ginbuyagyag ni Atty. Panelo nga wala naupod sa mga ebidensiya nga ginsumite batok kay Espinosa, ang pag-ako sini sa mga hearing sang Kongreso, nga may kaangtanan ini sa iligal nga droga rason nga mahina ang kaso kag ginbasura sang National Prosecution Service.