ILOILO CITY – Indi prayoridad sang Senado ang ginaduso nga pag-amyendar sang 1987 Constitution ilabi na sa political amendments.
Suno kay Senator Win Gatchalian, madamo sang mga senador ang wala nagapati nga kinahanglan ang Charter change ilabi na sa political amendments bangud nga para lang ini sa kaugalingon nga interes.
Dugang pa niya, ang pagpalaba pa sang termino ang indi para sa mga Pilipino kundi para sa mga pulitiko lamang.
Nahibaluan nga gin-aprubahan na sang House of Representatives sa third and final reading ang Resolution of Both Houses 6, nga nagapatawag sang isa ka constitutional convention agud amyendaran ang 1987 Constitution.
Ginpahayag ni Speaker Martin Romualdez nga katuyu-an sang Kamara nga i-limit ang Charter change initiative sa economic provisions sang constitution agud nga maka-enganyo sang mas madamo nga foreign investments.
Gin-abisuhan naman ni Gatchalian ang mga mamalidha nga magpamangkot anay sa mga eksperto kun bala, makabulig sa pungsod ang Charter change.
Una na nga ginpahayag ni Senate President Miguel Zubiri nga indi bastante ang yes votes sa Senado agud nga mapasar ang ginaduso nga Charter change.
