ILOILO CITY – Makig-istorya si Iloilo City Mayor Jerry Treñas sa Land Transportation Office tuhoy sa isyu sa angkasanay sa motorsiklo sa syudad sang Iloilo.
Kun basehan ang Executive Order ni Mayor Treñas kag Iloilo Gov. Arthur Defensor Jr. may kaangtanan sa pagpaidalom sang Western Visayas sa General Community Quarantine, ginapahanugutan ang pag-angkas sa motorsiklo kun mag-pamilya man lang kaangay sang mag-asawa, mag-amay ukon mag-iloy.
Sa interview sang Bombo Radyo kay Mayor Treñas, iya ginpahayag nga indi na kuntani problema pa kun mag-pamilya man lang ang naga angkas sa motorsiklo bangud adlaw-adlaw updanay man ini sa sulod sang balay.
Suno sa alkalde, nahangpan niya nga halin sa national office sang ahensya ang amo nga pagsulundan apang wala sang rason nga indi pagpaangkason sa motorsiklo ang mag-pamilya.
Samtang sa bahin naman sang mga requirements nga kinahanglan sang Land Transportation Franchising and Regulatory Board, subong lang ini nahibaluan ni Mayor Treñas nga may icomply pa ang mga transport groups antes maka byahe.
Nagpasalig man ang alkalde nga iya istoryahon ang Land Transportation Franchising and Regulatory Board tuhoy sa byahe sang mga depampasahero nga jeep.
