ILOILO CITY – Ginkwestyon sang Chancellor sang University of the Philippines Visayas ang pagpasar sang Sangguniang Panlungsod sang ordinansa nga nagadeklarar sang Chicken Inasal bilang cultural property sang Bacolod City.
Sa interview sang Bombo Radyo kay Dr. Clement Camposano, iya gin-usisa kun bala may yara sang napagkit sa maragtas nga ang Inasal ang nag-umpisa sa Bacolod City.
Suno kay Camposano, nagdako siya nga nagakaon sang inasal sa Iloilo.
Nagapati ang natungdan nga ang nasambit nga traditional Ilonggo street food ang nagakadapat nga kilalahon bilang cultural property sang mga Ilonggos.
Ginpahayag man sang natungdan nga wala magiyahan sang maayo ang mga nagduso sang ordinansa.
Nahibaluan nga agud mangin cultural property sang Bacolod City ang Chicken inasal, nagakadapat nga ipasa sa Philippine Registry of Cultural Properties ang ginpasar nga ordinansa.
Ang Philippine Registry of Cultural Properties amo ang talaguan sang mga impormasyon nahanungod sa cultural properties sa Pilipinas nga ginakabig nga importante sa cultural heritage.
