ILOILO CITY – Normal lamang ang pag-angkon sang Presbyopia ukon farsightedness ilabi na kun naga-edad sang 40 anyos pataas.
Sa pagpaathag ni Dr. Irene Peliño, Board of Examiner in Optometry sang Professional Regulation Commission kag miyembro sang Integrated Philippine Association of Optometrists, Inc., ang Presbyopia ang tuga sang pagkadula sang elasticity sang lens sa mata rason nga ang makita lamang amo ang mga butang nga yara sa malayo.
Suno kay Dr. Peliño, may yara sang prescribed lens nga ginahatag sa mga pasyente nga may Presbyopia kag ang nagakaigo nga eye grade ang mahibalu-an lamang paagi sa chek-up.
Ginpahayag ni Dr. Peliño nga ang prescribed lens ang nagapatin-aw sang panan-awan sang mga may Presbyopia kag wala sini ginapadako ang mga letra ukon butang nga dapat makita sang mata.
Masami nga sintomas sang Presbyopia amo ang pagsakit sang ulo tuga sang buron nga panan-awan kag agud nga makita, ginapalayo sang pasyente ang ginabasa agud nga mangin maathag ang mga letra.
Ang kabaliskaran naman sang Presbyopia amo ang Myopia ukon nearsightedness kun sa diin ang mga malapit lang nga butang ang makita.
Samtang, naga-umpisa na ang pagbaton sang indigent patients nga interesado nga mangin benepisyaryo sang proyekto nga “Panan-awan mo, Amligan ko” sang Integrated Philippine Association of Optometrists, Inc.
Suno kay Dr. Peliño, ang ila grupo ang masami nga nagapakigbahin sa Bombo Medico sang Bombo Radyo Philippines apang bangud sa pandemya, wala ini nadayon subong nga tuig.
May kaangtanan diri, ang mga qualified benificiaries ang mahimo nga makapakig-angot sa Bombo Radyo Iloilo para sa screening.
Lakip sa qualifications amo nga dapat naga-edad sang 40 anyos pataas, may deperensya sa mata kag dapat nga indigent.
Ang mga kwalipikado nga benipisyaryo ang makabaton sang libre nga check-up kag eyeglasses.
