May ginpadala nga sulat kay may ginlunsar nga online petition sa tuyo nga balabagan ang pag-apply ni former Presidential spokesperson Harry Roque sang asylum sa Netherlands.
Ang Philippine-born kag Dutch citizen nga si Joel Vega amo ang nagkumpirma sa iya Facebook page nga nagpasa siya sang sulat sa Immigration and Naturalization Service para pamatukan ang tikang ni Roque.
May online petition man ini nga gin-umpisahan nga ginatawag nga “Block Harry Roque’s Asylum Move to The Netherlands” kun sa diin mahimo makapirma ang “concerned Filipino citizens”.
As of press time, nakatipon na ini sang malapit 3,000 ka mga pirma.
Sa sulat ni Vega, ginsiling sini nga wala sang basehan ang mga pahayag ni Roque kaangot sa political persecution sa iya diri sa Pilipinas.
Sa pagkamatuod suno kay Vega, suod si Roque sa mga Duterte nga dominante gihapon ukon gamhanan kag may daku nga impluwensya sa pulitika diri sa Pilipinas.
Ginplastar man sini nga ang tuyo ni Roque nga magpangayo sang asylum amo nga likawan ang mga imbestigasyon nga nagaangot sa iya sa POGO.
Una na nga ginpahayag ni Roque nga kun mabaton ang iya aplikasyon para sa international protection, may kinamatarong siya sa non-refoulement, buot silingon suno sa iya, indi siya ma-deport tubtub nga maka-desisyon ang Dutch government sa iya aplikasyon.
Bisan madugay siya nga nangindulaan sa Pilipinas, nagpanginwala man ini nga pugante siya, kag nanindugan nga ginalikawan lamang sini ang subpoena halin sa House of Representatives kag indi arrest warrant halin sa korte.
Ginsiling man sini nga wala siya subong sa The Hague samtang nga ginahulat ang interview sa iya application.
