Ginkondena sang Pilipinas ang pagpang-atake sang Chinese law enforcers sa mga Vietnamese nga manugpangisda sa Paracel Islands sang nagligad nga Septyembre 29.
Ginlaragway ini sang National Security Council (NSC) nga “violent and illegal actions”.
Suno pa sa council, nagadampig ang Pilipinas sa Vietnam sa pagpanindugan nga dapat manabat ang China sa ila iligal nga aktwasyon sa tunga sang dagat.
Dapat man suno sa Pilipinas nga sundon man sang China ang international maritime laws kag untaton ang mga bayolente nga mga aktibidad nga nagabutang sa risgo sang kabuhi kag palangabuhian sang mga manugpangisda.
“We stand with Vietnam in denouncing this egregious act and calling for accountability. China must uphold international maritime laws and cease all hostile activities that endanger the lives and livelihoods of civilian mariners,” kabahin sang statement. “The Philippines reaffirms its commitment to peace, security, and respect for international law.”
Pahayag pa sang NSC, ini nga mga aktwasyon sang China ang nagadabok pa sa tension kag nagapaguba sa regional security.
Dugang sini, isa ini ka paglapas sa United Nations Convention on the Law of the Sea (UNCLOS) kag nagalapas man sa basic human decency.
“Such use of force against civilian fishermen blatantly violates international law, particularly the United Nations Convention on the Law of the Sea (UNCLOS), and breaches basic human decency. Fishermen, as vulnerable maritime workers, deserve protection—not harm—at sea,” kabahin sang statement.
Una na nga nag-protesta ang Vietnamese foreign ministry batok sa Beijing bangud sa amo nga insidente.
Ginaalegar nga 40 gid ka Chinese law enforcers ang nagpuli sa mga manugpangisda sang Vietnam paagi sa pagbakol sa ila sang salsalon kag 10 gid ang nasamaran, may nabalian sang tiil, may nabalian sang kamot, may nagkalalipong, kag may gindala pa sa ospital.
Magluwas nga nakastiguhan, ginkuha pa sang Chinese maritime authorities ang fishing equipment sang mga Vietnamese fishermen.
Antes ang naagyan sang Vietnam, nahibaluan nga ang Pilipinas ang masami nga puntariya sang agresibo nga mga hulag sang China sa West Philippine Sea kun sa diin ginagamitan ini sang water cannon, laser lights, ginatayaan sang mga patalom, ginabungguan kag ginabanggaan ang mga sakayan sa resupply mission, ginapangkuha man ang fishing equipment, kag gina-ikugan pati ang maritime drills apisar ini nga mga aktibidad ang sulod man sa exclusive economic zone ukon teritoryo mismo sang Pilipinas.
