TOKYO, JAPAN– Mas nangin matalunsay ang ginpatigayon nga programa kadungan sang pag-atubang ni Presidente Rodrigo Duterte sa Filipino Community sa Japan.
Suno kay Bombo International Correspondent Josel Palma direkta sa Japan, ini na ang ikatatlo nga pagbisita ni Duterte sa nasambit nga pungsod.
Kun ipaanggid suno kay Palma sa mga nauna nga programa, mas nangin matalunsay kag organisado sa subong ang ginpatigayon nga aktibidad.
Bilang isa sa mga marshall, ginpahayag ni Palma nga napuno ang venue sa Palace Hotel sa Tokyo sa diin nangin hugot ang seguridad nga ginpatuman halin sa Station 1 ukon entrance tubtub nga makalab-ot sa venue.
Ini bangud nga suno kay Palma, madamu sang requirements kag pasikot-sikot bag-o pahanugutan ang isa ka tawo nga makatambong sa programa.
Magluwas diri, may yara man sang ginpahamtang nga scanner agud nga masigurado nga wala sang kontrabando kag armas nga dala ang mga tumalan-aw.
Gintunga naman sa tatlo ka grupo ang mga tumalan-aw santo sa ila numero sa registration samtang may yara naman sang gintalana nga lugar para sa entourage sang Presidente nga ginalakipan sang kilala nga pulitiko, negosyante kag local celebrities.
