Pag-away sa climate change, proteksyon sa migrant workers, talakayon sa ASEAN meeting sa Iloilo

ILOILO CITY – Magasentro sa “people-centered” kag “people-oriented ASEAN’ ang ginapatigayon nga meeting sa siyudad sang Iloilo.
Kadungan sang pagbukas sang 22nd Senior Officials Committee for the ASEAN Socio-Cultural Community (SOCA) meeting kaina sang aga sa Iloilo Convention Center, ginpahayag ni SOCA chairperson Unersecretary Florita Villar nga duha sa anom ka mga prayoridad sang ASEAN 2017 Summit ang talakayon sa meeting sa Iloilo.
Igaduso sang organisasyon ang proteksyon para sa kinamatarong sang mga migrant workers; pag-amlig sa kinamatarong sang mga kababaihan, kabataan, persons with disabilities, mga tigulang, internally displaced kag indigenous people.
Pagahambalan man kun paano mapreserba ang kultura sang mga nasyon nga miyembro sang ASEAN kag ang cultural identity sang grupo bilang isa ka maimpluwensiya nga organisasyon.
Suno pa kay Undersecretary Villar, talakayon man kun paano masolusyunan ang malnutrisyon sa rehiyon kag pagpasangkad sang access sa healthcare.
Sa tunga sang madamo nga kalamidad nga naga-igo sa Asya ilabi na sa Pilipinas, talakayon man ang ASEAN resiliency.
Kinahanglan suno kay Villar nga maprotektahan ang palibot kag magpaminsar sang mga tikang batok sa climate change nga ginatudlo rason sang mga kalamidad nga nagakatabo sa Southeast Asia ilabi na sa Pilipinas.
Igaduso man sang ASEAN ang paghatag proteksyon sa biodiversity sa rehiyon.
Ang ASEAN ang ginabug-usan sang mga pungsod Pilipinas, Thailand, Vietnam, Indonesia, Singapore, Malaysia, Myanmar, Cambodia, Laos kag Brunei.