Ginaduso sa Kamara ang hagna nga dumilian na ang substitution sang mga kandidato sa tion sang eleksyon.
Suno kay House Deputy Speaker kag Cagayan de Oro City Rep. Rufus Rodriguez, ang pagpahanugot sang Comelec sa mga kandidato nga magbayluhanay ukon mag-substitute ang nagapakita lamang nga indi sila seryoso sa posisyon kun sa diin sila nag-file sang certificate of candidacy (COC).
Dapat suno sa natungdan nga tugutan lang ang substitution kun ma-disqualify ukon mapatay ang candidate-nominee sang isa ka political party antes ang eleksyon.
Sa idalom sang Comelec rules, tubtub pa sa Nobyembre 15 ang substitution deadline rason nga wala pa na-finalize sang komisyon ang lista sang mga aspirants apisar nga Oktubre 8 pa nagtakop ang filing sang COC.
