ILOILO CITY – Mas makapaayo nga may yara sang mitigating measures ang Iloilo City Government agud nga indi na maglapta ang African Swine Fever nga nakaapekto sa hog industry sang pungsod.
Ini ang nangin reaksyon ni Iloilo City Councilor Ely Estante, chairman sang Committee on Market and Slaughterhouse, kasunod sang Executive Order ni Mayor Jerry Treñas nga ginadumili-an ang pagbaligya sang canned kag meat products nga halin sa mga lugar nga may yara sang kaso sang African Swine Fever.
Sa interview sang Bombo Radyo kay Estante, iya ginpahayag nga indi lang luyag ni Mayor Treñas nga mangin apektado sang nasambit nga virus ang hog industry sa syudad sang Iloilo.
Suno kay Estante, magluwas sa importation ban, nagakadapat man nga sa slaughterhouse magpaihaw sang sapat agud nga masigurado ang katinlo sang karne.
Samtang, ginpahayag naman ni Dr. Peter Sobrevega, Officer-in-Charge, Regional Technical Director for Research sang Department of Agriculture 6, nga nagakadapat nga tutukan ang pagtapna sang nasambit nga virus.
Suno kay Sobrevega, kalabanan sa Pilipinas ilabi na diri sa Iloilo ang may ginasagod nga baboy rason nga madali nga maglapta ang nasambit nga balati-an.
Ginpahayag ni Sobrevega nga magluwas sa pagpanikasog sang gobyerno, kinahanglan man nga mangin responsable ang hog owners ilabi na sa pagpaihaw sang sapat.
Kinahanglan nga sa National Meat Inspection Services accreditted nga slaughterhouse ipaihaw ang sapat agud nga malimitahan ang posibilidad nga maglapta ang virus tuga sang mishandling.
