MANDURRIAO, ILOILO CITY – Ginpa-Bombo sang tag-iya sang punerarya ang pag-confiscate sa pila ka mga gamit sa ginpatigayon nga anti-illegal gambling activity sang mga kapulisan sa Barangay Airport, Mandurriao, Iloilo City.
Sa interview sang Bombo Radyo kay Alyas Nena, tag-iya sang punerarya, iya ginpahayag nga nalakip sa gin-confiscate amo ang 11 ka mga pulungkuan kag duha ka mga lamesa.
Sa matuod suno kay Alyas Nena, indi ini ang una nga bes nga ginkuha sang kapulisan ang ila mga gamit bangud ini ang natabo man sa Barangay Calumpang, Molo, Iloilo City.
Naghingyo naman ang natungdan sa Mandurriao Police Station nga ibalik nalang ang ila mga gamit bangud ginagamit nila ini sa mga namatyan nga ila ginaserbisyuhan.
Samtang, ginpaathag naman ni Police Colonel Joeresty Coronica, director sang Iloilo City Police Office nga mahimo nga mag-request sa korte ang punerarya nga ibalik ang ila mga gamit, pananglitan nga wala ini nalakip sa mga akusado.
Suno kay Coronica, mandatory ang pag-confiscate sang mga kapulisan sang mga gamit bangud ini man ang ginagamit bilang ebidensya.
Gipahayag dugang sang natungdan nga samtang wala pa na-file ang kaso, yara sa gihapon sa kustodiya sang mga pulis ang nasambit nga mga pagkabutang.
