ILOILO CITY- Ginpaathag sang pinuno sang Provincial Disaster Risk Reduction and Management Office (PDDRMO) sang Iloilo Provincial Government ang madasig nga pagdaludo sang tubig halin sa kabukiran kag nagtuga sang madalom nga baha sa pila ka kabanwahanan kadungan sang ulan nga dala ni bagyo Agaton.
Sa interview sang Bombo Radyo kay Dr. Jerry Bionat, head sang Provincial Disaster Risk Reduction and Management Office (PDDRMO), iya ginpahayag nga kalabanan sa mga forest land sa kabukiran sang quinto distrito ang gin-convert sa agricultural land.
Suno kay Bionat, apisar nga may benepisyo ini para sa mangunguma, mas mabug-at ang long-term nga disbentaha sini sa komunidad sa pangkabilugan.
Pahayag niya, ang natabo sa kabanwahanan sa 5th district nga ginalakipan sang Ajuy, Balasan, Barotac Viejo, Batad, Carles, Concepcion, Estancia, Lemery, San Dionisio, San Rafael kag Sara amo nga sang tion nga nagbubo ang mamunog nga ulan, kalabanan sa mga kabukiran ang wala na sang mga tanom bangud napang-harvest na ang mga ini.
Paathag niya, ini ang rason kun ngaa madasig nga nagdaludo ang tubig halin sa kabukiran kag nagdirekta ini sa manubo nga bahin sang nasambit nga kabanwahanan nga nagtuga sang lapnagon nga pagbaha kag nagresulta sa kamatayon sang lima ka mga residente.
