ILOILO CITY – Nakadepende sa attending physician ang pagdesisyon kun bala ipa-cremate ukon indi ang bangkay sang nagtaliwan nga pasyente.
Ini ang gin-athag ni Dr. Jessie Glen Alonsabe, pinuno sang Regional Epidemiology and Surveillance Unit sang Department of Health Region 6, may kaangtanan sa reklamo sang pila ka pamilya nga gin-cremate ang bangkay sang ila himata apisar nga nagnegatibo man sa COVID-19.
Sa interview sang Bombo Radyo kay Alonsabe, iya ginpahayag nga ang ginasunod sang mga doktor amo ang Sanitation Code of the Philippines kun sa diin ang mga pasyente nga nagtaliwan bangud sa infectious diseases ukon makalalaton nga balati-an ang dapat nga i-cremate.
Kun wala sang available nga crematorium suno kay Alonsabe, ang bangkay ang dapat nga ilubong gilayon agud nga indi na maglapta ang balati-an.
May kaangtanan sa reklamo sang pila ka pamilya sang mga pasyente nga may exposure sa virus, ginpahayag ni Alonsabe nga malakip sa cremation ang COVID-19 positive, COVID-19 probable kag COVID-19 suspect nga nagtaliwan.
