ILOILO CITY – Ginakabig sang oposisyon nga game changer ang pagpahamtang sang China sang missiles sa tatlo ka reefs sa West Philippine Sea.
Sa interview sang Bombo Radyo, ginpahayag ni Magdalo Rep. Gary Alejano nga kilala nga kritiko sang Duterte administration nga maka-alarma ang tikang sang Beijing.
Tuyo sini suno kay Alejano nga kontrolon sang China ang bilog nga West Philippine Sea ukon South China Sea.
Bangud sa pag-deploy sang missile, halos nalikop na sang China suno kay Alejano ang mga gina-agawan nga teritoryo.
Ginpahayag sang mamalidha nga ang anti-ship missile sang China nga may range nga 500 tubtob 600 kilometers ang makalikop na sa bug-os nga isla sang Palawan samtang ang anti-air missile ang makalab-ot na sa Balabac, Palawan.
Tuman ka delikado ini suno kay Alejano bangud nga ang siyam ka mga isla kag reef sang Pilipinas ang malab-ot na sang missiles nga ginbutang sang China sa West Philippine Sea.