ILOILO CITY – Gina-abi-abi sang Sangguniang Panlalawigan ang positibo nga sabat sang Iloilo Police Provincial Office may kaangtanan sa ila plano nga mag-request sa deployment sang kapulisan sa Ungka flyover agud nga makabulig sa pagdelihir sang trapiko.
Una na nga ginpahayag ni Iloilo Police Provincial Office director Police Colonel Ronaldo Palomo nga nakanda sila nga magsunod sa request sang provincial board.
Sa interview sang Bombo Radyo kay Ex-officio Board Member Ramon Sullano, chairman sang Committee on Transportation, iya ginpahayag nga dako ang mabulig sang mga kapulisan sa pagpahagan-hagan sa pagpugok sang trapiko sa flyover.
Suno kay Sullano, tuman ka gutok sang trapiko sa idalom sagng flyover bangud nga ang mga traffic aides ang yara sa atubang sang isa ka sementeryo.
Dugang pa niya, ang iban nga mga traffic aides ang nakulbaan man nga magsaway sa mga drivers.
Sa tion naman nga may yara sang vehicular accident sa lugar, mas madali nga ma-resolve ini kun yara na nga daan ang presensya sang kapulisan.
Sa subong suno kay Sullano, may yara sa gihapon sang traffic congestion sa Ungka flyover.
Nagahatag man sang kabalaka ang girder sang flyover nga tuman ka delikado para sa mga nagalabay.
Sa ginpatigayon nga committee hearing sang nagligad nga semana, ginsuhestiyon man sang mga board members sa Department of Public Works and Highways nga kun mahimo nga mabutangan sang monitoring device ang lugar agud nga mahibaluan kun may yara sang paghulag sa girder nga makatuga sang aksidente.
