ILOILO CITY – Kinamatarong sang publiko nga kwestyunon ang bakuna nga amo ang ginapilit nga ihatag sa ila ilabi na subong nga tion sang pandemya.
Ini ang pahayag ni Msgr. Meliton Oso, director sang Jaro Archdiocesan Social Action Center, kasunod sang nagatunog pa nga panawagan sang publiko nga indi paghimuon nga mandatory ang COVID-19 vaccination.
“Basic freedom sang tawo ang pagdesisyon kun mapabakuna siya ukon indi siya magpabakuna. ‘Ano imo labot kay akon ni ya lawas?’ Ang paghimo sini nga mandatory — sa akon personal nga panan-aw — may ara na sang ethical problem bangud paglapas ina sa kinamatarong sang isa ka tawo,” pahayag ni Msgr. Oso sa interview sang Bombo Radyo, Enero 9.
Magluwas diri, makaalarma suno kay Oso ang kadasigon sang vaccine development ilabi na bangud, kun huna-hunaon, sang nagligad lang nga tuig naglupok ang pandemya apang pagkasunod nga tuig, naaprubahan na ang bakuna kag gin-umpisahan ang pagtublok sini sa mga tawo sa nanuhay-tuhay nga pungsod.
“Dapat informed ang isa ka tawo nga magabaton sang bakuna.” dugang pa ni Oso samtang ginatumod kun daw ano ka-importante ang informed consent. “Natestingan bala ini sang maayo? May side effects bala ini sa lawas sang tawo partikular na sa mga immunocompromised? Kun mag-consent gid man ako, dapat bal-an ko ang harm kag bal-an ko ang benepisyo.'”
Apang gin-athag ni Oso nga wala nagapamalibad ang Simbahang Katolika sa bakuna. Sa pagkamatuod suno sa iya, sa bahin sang Social Action Center, gina-istoryahan man ang pagtipon sang pondo para makabakal sang COVID-19 vaccine nga amo ang libre nga ihatag sa desidido magpabakuna nga staff.
Ginpahayag man ni Oso nga apisar wala sila sang ginauyatan nga pagtuon, mas kilala sa ila bahin ang bakuna sang Pfizer bangud may ara sila sang drugstore kag diri nga pharmaceutical company sila regular nga nagakuha sang bulong.
Apang para naman sa ikaayo sang general public, mas maayo gid suno kay Oso kun mas ipahangop sang maayo kun ang benepisyo kag risgo sang vaccination.
Lakip man sa ginakinahanglan suno kay Oso amo ang Siyensya nga indi magpabakal sa mga kumpaniya; buot silingon, scientists nga handa magplastar sang husto nga pagtuon ‘at the service of humankind.’
Nahibaluan nga sa Iloilo Province kag Iloilo City, lunsay na nagpasalig ang mga lider nga pabaskugon pa ang kampanya agud nga maedukar ang pumuluyo sa safety kag efficacy sang bakuna.
Sa Pilipinas, santo sa resulta sang isa recent Pulse Asia survey, 47% sang mga Pinoy ang nagapamalibad nga magpabakuna.
Sa 2,400 ka adults nga ginsurvey sang Nov. 23-Dec. 2 sang 2020, 47 percent ang nagsiling nga i-skip ang inoculation, 32 percent ang handa nga magpa-vaccinate, kag 21 percent ang undecided.
“Ang tawo indi mo gid mabasol kun indi sila magpabakuna, unless ihatag mo ang solid nga komento nga ang side effects sini ang natun-an gid sang maayo. Again, informed consent,” dugang nga pahayag ni Oso.
33833835 Comments19 SharesLikeCommentShare
