ILOILO CITY – Wala sang mabug-at nga epekto sa kandidatura ni Former Senator Ferdinand “Bongbong” Marcos Jr. ang proklamasyon sang PDP-Laban Cusi wing nga nagasuporta sa iya kun indi maghalin mismo kay Presidente Rodrigo Duterte ang endorsement.
Sa interview sang Bombo Radyo kay Atty. Joenar Pueblo, Bombo abogado kag isa ka political analyst, iya ginpahayag nga mabug-at ang endorsement kun halin mismo kay Presidente Rodrigo Duterte.
Suno kay Pueblo, dako ang bulig sang endorsement sang presidente bangud nga makuha sang kandidato ang suporta sang bilog nga Mindanao kag magamit ang administration machineries.
Dugang pa ni Pueblo, tama man ka makatilingalahan bangud ang PDP-Laban ang gintukod ni the late Aquilino Pimentel Jr. agud nga batu-an ang Marcos regime.
Ginklaro ni Pueblo nga wala nagakahulugan nga sigurado na nga madaog ang isa ka kandidato kung suportahan sang presidente kundi mahibaluan lang ina sa maabot nga Mayo 9.
