Isa lang ka semana ang ihatag sang Commission on Elections (Comelec) sa pag-file sang Certificates of Candidacy (COC) para sa May 2022 Elections humalin Oktubre 1 tubtob Oktubre 8 subong nga tuig.
Sa interview sang Bombo Radyo kay Atty. Jonar Pueblo, iya ginpahayag nga samtang nagahilapit ang eleksyon, madamo ang nagaka-interesar nga magpadalagan sa mga posisyon kaangay sang presidente, bise presidente, senador kag iban pa.
Ang Presidente suno kay Pueblo amo ang naga-execute sang mga layi kag ini ang pinaka-unique nga posisyon bangud ginahatag lang ang executive power sa isa ka persona sa diin ginakabig ini nga pinaka-gamhanan.
Ang katungdanan naman sang pagka-bise presidente amo ang maghulat pahayag sang abogado tubtob nga indi na masarangan pa sang presidente nga tungdan ang iya obligasyon ukon ini ang mapatay.
Ang mga senador dugang pa niya ang ginakonsidera nga mga “future presidentiables”. Apang magluwas sa legilative work, naga-akto man ang senador bilang tribunal sa impeachment case.
Kun ano man nga posisyon ang pagadalaganan sa eleksyon, nagakadapat anay nga mag-file sang COC nga amo ang dokumento suno kay Atty. Pueblo nga nagapakita nga may yara ikaw sang interes nga magpadalagan sa isa ka pwesto.
Gin-athag man sang abogado nga ang Certificate of Nomination and Acceptance (CONA) ang gina-attach sa COC bangud ini ang magaserbe nga pamatuod nga may yara sang political party nga magasuporta sa isa ka persona kun magpadalagan ini sa eleksyon.
