MANILA – Magatanyag sang special loan restructuring ang Pag-IBIG fund para sa mga miyembro nga wala nakabayad sang utang bangud sa Coronavirus Disease 2019 (COVID-19) pandemic.
Suno sa Pag-IBIG, mahimo nga makabenepisyo ang mga wala nakabayad sa sulod sang anum ka bulan humalin sang nag-umpisa ang pandemya.
Ang wala nabayaran sa sulod sang anum ka bulan ang igakarga sa ginbag-o nga loan scheme rason nga magalawig ang payment method.
Sa pagpaathag ni Acmad Moti, Chief Executive Officer sang Pag-IBIG Fund, valid ID kag selfie nga gina-uyatan ang ID ang kinahanglan nga requirements kun sa diin wala sang processing fee ang online application.
Magapadala sang text mesage ang Pag-IBIG fund sa mga kalipikado nga miyembro.
Ang nasambit nga programa ang natalana nga aprobahan sang Pag-IBIG board agud nga maumpisahan na ini sa Nobyembre.
