Gin-aprubahan sang Sugar Regulatory Administration (SRA) Board ang importasyon sang 440,000 metric tons sang kalamay agud nga makadugang sa local supply kag agud mapanubo ang presyo sini sa merkado.
Suno kay SRA board member Pablo Azcona nga amo ang nagatiglawas sang sugarcane planters, may board meeting nga ginpatigayon kahapon apang kinahanglan pa nga paguwaon ang sugar order halin sa Office of the President.
Sa sini nga importation plan, 200,000 metric tons ang nakapain para sa consumer use kag 240,000 metric tons naman para sa buffer stocking purposes.
Ang 100,000 MT ang mahimo makasulod sa pungsod sa labing-madali nga tion samtang ang dugang nga 100,000 MT ang pahanugutan lamang nga makaabot pagkaligad sang Abril 1.
Ang nabilin nga 240,000 metric tons ang mahimo makasulod bisan ano man nga tion kag dapat magtukod sang duha ka bulan nga buffer stock bilang sunod sa mandu ni President Ferdinand R. Marcos Jr.
Tanan nga imported sugar ang inisyal nga i-classify bilang C sugar ukon reserved sugar kag dapat mag-agi sa usual conversion guidelines antes ipakonsumo sa publiko. ##
