Ginkumpirma ni Commission on Elections chairperson George Erwin Garcia nga indi pagdayunon sang poll body ang printing process nga inisyal nga magapadayon subong nga adlaw, Enero 22 sa tunga sang bag-o nga Temporary Restraining Order nga gin-issue sang Supreme Court.
May kaangtanan ini sa kaso sang disqualifications nanday Francis Leo Marcos kag Noel Rosal sa 2025 May midterm elections.
Nag-file si Marcos sang candidacy para sa pagka-senador samtang si Rosal naman ang nag-file sa pagka-gobernador sang Albay, ang posisyon nga iya gin-uyatan sang 2022.
Kahapon, nag-isyu ang Supreme Court sang temporary restraining orders batok sa ila disqualifications.
Una diri, ginpahayag ni Garcia nga kinahanglan sang poll body sang duha tubtob tatlo ka adlaw nga maghimo sang adjustments sa database sini, magpatigayon sang serialization sa official ballots, kag mag- produce sang 1,600 ballots faces sa tion nga magpagwa ang korte sang bag-o nga TROs sa disqualification sang aspirants nga nagapadalagan sa mga posisyon para sa eleksyon.
Matandaan nga ginsuguran ang printing sang 73 million ballots sa sini nga tuig nga eleksyon sang Enero 6 apang gin-untat kasunod sang issuance sang High Court sang TRO batok sa disqualification sang pila ka lokal nga kandidato sa May 12 midterm polls.
Ini nagresulta sa pagbasura na lang sang six million printed ballots nga nagabalor sang kapin P132 million.
