ILOILO CITY – Ginpa-Bombo sang isa ka residente ang serye sang inaway sang mga kabataan nagikan sa Tanza Patyo ukon Delgado St., Mabolo kag Tanza-Esperanza, Iloilo City.
Sa interview sang Bombo Radyo kay Ma’am Gee, iya ginpahayag nga kaina sang kaagahon, duha gid ka hugnat ang natabo nga inaway sa tunga sang duha ka grupo sang kabataan.
Suno kay Ma’am Gee, nagadalagan ang mga kabataan nga ginabanta naga-edad sang 12-18 anyos, nagahabyanay sang bato, botelya kag kahoy.
Pahayag pa niya, may yara sang isa ka bata nga nagadala pa sang kutsilyo.
Apang suno sa iya, wala man nagalab-utanay ang mga ini kundi nagahagaray lamang nga mag-inaway.
Bangud sini, nagaka-apektuhan ang ila pahuway kag delikado pa sa mga nagalabay sa lugar.
Gina-report man nila ini sa kapulisan kag ginarespondehan man sang otoridad apang gilayon man nga nagapalagyo ang mga kabataan.
Indi ini ang una nga tion nga naga-away ang mga kabataan suno sa tagreklamo.
Humalin sang nagsaylo sila sa lugar lima ka tuig ang nakaligad, masami na nga naga-away ang mga pamatan-on apang tubtob subong, wala sa gihapon natapna.
