Pag-inventory sang existing tricycle route plan, gin-umpisahan na sang Tricycle Task Force sa syudad sang Iloilo

ILOILO CITY – Nag umpisa na sa pag inventory sang mga existing tricycle route plan ang mga katapo sang Tricycle Task Force sa syudad sang Iloilo.

Ini ang ginabug-osan nanday Iloilo City Mayor Jerry Treñas bilang chairman, Iloilo City Police Office Director PCol. Eric Dampal bilang vice-chair kag mga myembro nga sanday Councilor Rommel Duron, Liga ng mga Barangay President Maria Irene Ong, Engr Badong Pedregosa sang City Engineers Office, Mr Boyet Rico executive assistant for Brgy Affairs, Jeck Conlu pinuno sang Public Safety and Transportation Management Office, Butch Peñalosa sang City Planning Office kag Mr. Roy Defiño, direktor sang Department of the Interior and Local Government-Iloilo City.

Sa interview sang Bombo Radyo kay Defiño, iya ginpahayag nga ginpirmahan na ni Mayor Treñas ang Executive Order 040 nga nagatukod sang tricycle taskforce agud nga i-formulat kag i-revise ang Iloilo City Tricycle Route Plan sang nakaligad nga Pebrero 26.

Suno kay Defiño, ang pagpatigayon sang inventory ang may katuyuan nga mahibaluan kun pila ka mga tricycle ang naga-agi sa national highway base man sa data nga ginakaptan sang Tricycle Regulatory Board sang syudad.

Nahibaluan nga base sa rekord, kabug-osan nga 1,092 ka mga tricycle ang nagabyahe sa syudad sang Iloilo.