ILOILO CITY – Ginabanta nga magalawig sang duha ka oras ang pag-orden sa Ilonggo nga pari nga magaserbe nga Auxiliary Bishop sa Cebu City.
Sa interview sang Bombo Radyo kay Fr. Angelo Colada, tagpamaba sang Archdiocese of Jaro, iya ginpahayag nga magalawig sang inoras ang patigayunon nga pag-orden kay Most Rev. Fr. Midyphil Billones buwas nga adlaw.
Suno kay Fr. Colada, lakip sa magatambong sa nasambit nga aktibidad amo sanday Archbishop Gabriele Giordano Caccia, papal nuncio to the Philippines, Manila Archbishop Luis Antonio Cardinal Tagle, Jaro Archbishop Jose Romeo Lazo, Cebu City Archbishop José Serofia Palma, Davao City Archbishop emeritus Fernando Robles Capalla, mga arsobispo, obispo kag mga pari sa pungsod.
Ginpahayag ni Fr. Colada nga ang mga dinapit nga bisita ang nag-abot subong nga adlaw kag nagtinir sa Archbishop Palace, Jaro Cathedral, St. Vincent Ferrer Seminary samtang ang iban naman ang nagtinir sa hotel.
Si Caccia ang magaserbe nga tiglawas ni Pope Francis kag magabasa sang sulat sang Santo Papa para kay Billones.
Matapos ma-ordenan, si Billones ang magaserbe nga kabulig ni Archbishop Palma sa Cebu City.
Ginakabig naman sang natungdan nga dungog para sa Western Visayas ang kadalag-an nga nalab-ot ni Billones.
Nahibalu-an nga si Billones ang ginbun-ag sa Pan-ay, Capiz, nag-eskwela sa St. Vincent Ferrer Seminary kag nagtapos sang Theology sa San Jose Seminary sa Ateneo De Manila Loyola School of Theology.
Naga-isahanon na lang si Billlones bangud nagtaliwan na ang iya ginikanan kag ang iya utod.
Si Billones ang nagserbe sadto nga parochial vicar sa Archdiocese of Jaro, nagserbe bilang secretary ni Archbishop Jover Piamonte kag nagaserbe nga secretary kag vice chancellor sang tion ni Archbishop emeritus Angel Lagdameo.
