ILOILO CITY – Padayunon sa gihapon sang Iloilo City Government ang pagpa-idalom sa Reverse Transcription Polymerase Chain Reaction (RT-PCR) test kag 14 day quarantine sa mga maga-abot nga Locally Stranded Individuals kag repatriated Overseas Filipino Workers apisar nga may yara sang bag-o nga protocol ang Inter-Agency Task Force.
Sa interview sang Bombo Radyo kay Mayor Jerry Treñas, iya ginpahayag nga ginpasiguro sang Inter-Agency Task Force nga antes pa man papuli-on ang mga Locally Stranded Individuals kag repatriated Overseas Filipino Workers sa tagsa ka mga probinsya, kinahanglan nga ipa-idalom anay ini sa RT-PCR test sa Metro Manila indi kaangay sadto nga ginapa-idalom lang sila sa rapid test.
Suno kay Mayor Treñas, nagapasalamat siya sa national government sa nasambit nga protocol bangud mahatagan ini sang kumpiyansa ang syudad nga ang mga maga-abot nga LSI kag OFW ang COVID-free.
Nahibaluan nga as of June 27, 32 na nga mga repatriates ang na rekord sa syudad sang Iloilo nga nagpositibo sa COVID-19.
