AKLAN– Naatrasar sang halos tatlo ka oras ang pagpauli sang isa ka pastor kag iban pa nga mga pasahero bangud indi sila pagpahanugutan nga makapanaog sa bus nga ila ginsakyan gikan sa Mindoro ilabi pa nga may border restrictions sa Aklan.
Sa interview sang Bombo Radyo kay Pastor Francis Niel Jalandoon, iya ginpahayag nga sang pag-abot nila sa Caticlan Port, ang mga pumuluyo lang sang Aklan ang una ginpahanugutan nga makapanaog.
Suno kay Jalandoon, ginkakibot nila ang nasambit nga sitwasyon bangud sa ila pagpati buwas pa nga adlaw, Marso 17, magaepekto ang border closure rason nga naghingagaw sila sa pagpauli.
Ginpahayag ni Jalandoon nga nagtawag pa sila kay Iloilo Governor Atrthur Defensor Jr. agud ipalab-ot ang ila sitwasyon.
Matapos sang tatlo ka oras nga negosasyon, ginpasugtan na sila nga makabiyahe padulong sa Iloilo.
