Ginduso ni House Committee on Ways and Means chairperson kag Albay 2nd District Rep. Joey Salceda ang refund sa mga konsumidor sang ginaalegar “unauthorized” excess revenues nga ginkolekta sang National Grid Corporation of the Philippines (NGCP).
Yara ini sa ginabanta nga P204 billion humalin sang 2016 tubtob 2020.
Suno kay Salceda, base sa Energy Regulatory Commission’s preliminary rate review, P183.5 billion lamang sa P387.8 billion nga revenue sang korporasyon para sa amo nga period ang aprubado sang ERC.
Pahayag ni Salceda, ang P204 billion ang minimum lang bangud para ini sa completed projects apang kun ilakip ang incomplete projects nga wala gin-isip sang ERC, mas dako pa ini sa P204 billion.
Nahibaluan nga indi magnubo sa duha ka mga kongresista ang nagduso para sa NGCP ngai – refund ang franchise tax nga ginpasa sini sa mga consumers antes ang ERC nag-isyu sang resolution nga naga- suspend sang amo nga tikang.
Humalin sang gin-isyu ang ERC resolution, ginsiling sang Bureau of Internal Revenue nga ang NGCP ang regular nga nagabayad sang franchise tax, nga naga-average sang P1.3 tubtob 1.5 billion kada tuig humalin sang 2018, base sa records sang komisyon.
Para naman kay APEC Party List Representative Sergio Dagooc, kinahanglan nga imbestigaran para sa legal accountabilities ang ERC officials nga nag-approve sang 2011 resolution nga nagpahanugot sa NGCP nga ipasa sa consumers ang 3 percent franchise tax.
