ILOILO CITY – Magatutok sa pag-relocate sang mga informal settlers ang opisina sang Iloilo City Local Housing Office subong nga may yara sila sang bag-o nga pinuno.
Sa interview sang Bombo Radyo kay Atty. Peter Jason J. Millare, pinuno sang opisina, iya ginpahayag nga nagdangat sa 40, 000 tubtob 50, 000 ka mga informal settlers ang kinahanglan nga mahatagan sang permanente nga balay sa mga relocation sites nga nagapuyo subong sa mga danger zones kaangay sang higad sang creeks ukon suba.
Suno kay Millare, indi pa sila makasugod subong nga tuig bangud nga madamo pa sang mga dapat hitsuhon kaangay na lamang sang pagtukod sang committee ilabi na sa applications kag awards.
Pahayag niya, ipaidalom anay sa seminar ang mga personnel nga natalana man nga dugangan.
Sa tion nga mahanda na ini tanan, magapatigayon sila sang survey.
Dugang pa niya, magapakig-angut sila sa mga barangay officials agud nga ma-locate ang mga residente sang syudad nga kinahanglan nga i-relocate.
Nagpasalig man si Millare nga sa idalom sang iya pagdumala, mangin transparent ang iya opisina kag ipatuman ang participatory governance.
