Nagsaka na sa 274 ang numero sang nagkalamatay sa Gaza sa isa ka operasyon sang militar sang Israel kun sa diin ila nahilway ang apat ka buhi nga mga bihag nga gintago sang Hamas militants sa sulod na sang walo ka bulan.
Sa udto ginpatigayon ang raid sang nagligad gid lamang nga adlaw sa Nuseirat refugee camp area sa central Gaza kun sa diin ginsulod ang duha ka buildings kag gin-rescue ang mga bihag paagi sa helicopters.
Malawig nga lukpanay kag pagsigabong ang natabo kadungan sang operasyon kun sa diin isa ka Israeli police officer ang napatay, samtang naglunsar naman ang Israeli air force sang strike nga amo ang ginpahayag nagpudpod pati sa kaingod nga mga building.
Nakapauli kag nakahakos na sa ila pamilya ang apat ka buhi nga Israeli hostages, apang sa pihak nga bahin, gin-report naman sang Gaza Strip Health Ministry nga bangud sa operasyon, may 274 nga napatay sa Gaza kag 698 nga nagkalamasaran.
Ginsiling man sang Hamas armed wing nga al-Qassam Brigades nga ang operasyon sang Israel ang nagpatay man sa tatlo ka iban nga mga bihag lakip na ang isa ka American citizen.
Gilayon man nga ginkondenar sang European Union ang hitabo kag gintawag ini nga “Nuseirat massacre”.
Ang Nuseirat isa ka built-up refugee camp nga natukod halin pa sang 1948 Arab-Israeli war.
Ang operasyon sang Israel amo ang pinakadaku nga rescue operation nga nahimo sini halin sang nagsalakay anay ang Hamas militants kag ginpangpatay ang masobra 1,200 ka mga sibilyan kag gindala ang 250 ka mga bihag halin sa southern Israel sang Oktubre 2023. Ang pagtimalos naman sang Israel sa Palestinian militants sa Gaza ang nagbilin na sang 36,700 ka mga patay suno sa Health Ministry.#
