ILOILO CITY – Wala na ginkakibot pa sang kaupdanan sa Liberal Party ni Iloilo City Mayor Jed patrick Mabilog ang desisyon sini nga maghalin sa Liberal Party.
Sa interview sang Bombo Radyo kay City Councilor Armand Parcon, sa Bombo Radyo lang sini nabatian nga nagbiya na sa partido ang alkalde.
Wala man ang konsehal sang ideya sa rason ni Mayor Mabilog sa pag-resign sa partido.
Ginpahayag sang konsehal nga antis nagdesisyon ang alkalde nga mag-resign sa ila partido, wala ini makapahibalo sa ila.
Nagpamalibad naman nga mag-speculate si Konsehal Parcon kun ano ang rason sang paghalin ni Mabilog sa Liberal Party.
Angot sini, wala pa makadesisyon si Konsehal Armand Parcon kun magasaylo sa PDP-Laban ukon magpabilin sa Liberal Party, ilabi na nga nag-resign na sa partido Liberal si Iloilo City Mayor Jed Patrick Mabilog.
Sa interview sang Bombo Radyo Iloilo, ginpahayag sang konsehal nga madamo pa ang posible matabo sumugod subong tubtob 2019 kun san-o hiwaton ang masunod nga eleksyon.
Suno sa konsehal magapabilin nga bukas ang iya panghuna-huna kag tagipusoon sa tanan nga mga pagdesisyon.
Ginpaathag dugang ni parcon nga indi isyu para sa iya kun sa diin siya nga partido, bangud siya man ang nagahimo sang iya kapalaran sa pulitika.
Nahibaluan nga gintanyagan ni Iloilo City Congressman Jerry Trenas ang mga konsehal sang siyudad nga magsaylo na sa PDP-Laban nga partido ni Presidente Rodrigo Duterte.