Nag-angkon sang nanuhay-tuhay nga reaksyon halin sa mga lideres sang pungsod ang pag-resign ni Vice President Sara Duterte bilang tiglikom sang Department of Education, vice chairperson sang National Task Force to End Local Communist Armed Conflict (NTF-ELCAC), kag myembro sang Gabinete ni President Ferdinand “Bongbong” Marcos, Jr.
Para kay ACT Teachers Party-list Rep. France Castro nga isa sa pinakamatunog nga kritiko sang bise-presidente, “long overdue” na ang resignation ni Sara kag kuntani suno sa iya, mas gintemprano sini ang pagpanaog para mahatag ang pwesto sa opisyal nga halin mismo sa sektor sang edukasyon kag nakahibalo gid sang iya trabaho.
Nawasi suno sa iya ang duha ka tuig agud nga masolbar ang krisis sa edukasyon sa Pilipinas.
Ang pagpanaog ni Duterte suno kay Castro ang nagamarka man sang “open war” sini sa mga Marcos.
“The resignation of Vice President Duterre from the Marcos Jr. Cabinet marks the open war between the former allies and the upcoming escalation of hostilities between the two camps,” suno sa House Deputy Minority Leader. “Sana ay mas maaga niya ito ginawa para makapaglagay ng isang kalihim ng DepEd na galing talaga sa sektor ng edukasyon at alam ang kanyang ginagawa. Nasayang ang dalawang taon para ayusin agad ang education crisis sa bansa at benepisyo at sahod ng mga guro at education support personnel.”
Para naman kay Gabriela Rep. Arlene Brosas, isa ka “political move” ang ginhimo ni Sara bilang preparasyon sa 2025 midterm elections para mahanda ang entablado sa ginapanan-aw nga agaway sa gahum sa tunga sang Duterte kag Marcos factions.
Ginplastar naman ni anay presidential spokesperson Harry Roque nga pormal na nga naalimunaw ang UniTeam nga alyansa anay ni Marcos kag Duterte sang 2022.
Ginsiling sini nga nangin lider na sang oposisyon si Sara — bagay nga iya ginkalipay kag ginsiling nga sa katapusan, may matuod na nga lider ang Pilipinas nga magadala sang transparency, accountability, kalinong, kag seguridad.
“Uniteam has formally been dissolved and she has just become the leader of the opposition. The line has been drawn! The Philippines finally has a real leader. Onwards to transparency, accountabilty, peace and security! Let’s redeem the Philippines!” pahayag ni Roque sa isa ka Facebook post.
Sa bahin sang Senado, nagpaguwa sang statement si Senate President Chiz Escudero nga ginatahod sini ang desisyon ni Sara.
Ginsiling sini nga “inevitable” ang resignation sang bise-presidente halin sang tion nga gin-atake ni anay Presidente Rodrigo Duterte, Duterte family, kag ila mga kaalyado si President Marcos kag ang First Family.
Maathag na ini halin sang una suno kay Escudero bangud matinong kag wala sang komento si Sara sa isyu sa West Philippine Sea, Bagong Pilipinas Hymn, kaso ni Quiboloy, kag madamo nga iban pa.
”I believe that people love and respect her precisely for that… for having and fighting for what she believes in and for her own beliefs,” dugang ni Escudero.
Ginahulat naman ang mangin statement ni House Speaker Martin Romualdez nga pakaisa ni Marcos kag nakaaway man anay sang bise-presidente kag ginhambalan nga “tambaloslos”.
Kahapon, sa iya speech, wala sang ginhatag nga rason si Sara sa iya pagpanaog sa pwesto apang gin-athag sini nga indi ini palatandaan sang iya kahinaan. Epektibo Hulyo 19 ang amo nga resignation.
Magapabilin siya nga bise-presidente kag magapanguna sa programs, activities, kag projects sang Office of the Vice President.
