ILOILO CITY – Pagatingubon ang tanan nga problema kag magapirma ang mga Market Federation President lakip na ang Market-In-Charge agud mapalab-ot sa Iloilo City Government ang nagakatabo nga pag-retail sang isda sa Iloilo Fish Port Complex.
Sa interview sang Bombo Radyo kay Raymond Hortillas, Market-In-Charge sang La Paz Public Market, iya ginpahayag nga ginplastar na nila ang mga problema agud mahatagan sang nagakaigo nga solusyon.
Magapakig-angot man sila suno kay Hortillas kay Ariel Castañeda, pinuno sang Local Economic and Enterprise Office para sa isa ka pagsinapol.
Suno kay Hortillas, kinahanglan nga masolusyunan gilayon ang nasambit nga problema bangud kun indi, mahimo nga maputo ang negosyo sa sulod sang mga merkado sa syudad sang Iloilo bangud sa kumpetisyon nga ginahimo sang retailers sa sulod sang Iloilo Fish Port Complex.
Kun mapresentar na ang nasambit nga problema sa Iloilo City Government suno kay Hortillas, posible nga makadihon sang ordinansa nga indi mahimo nga maka-retail sa sulod sang Iloilo Fish Port Complex.
Nahibaluan nga magluwas sa Iloilo Fish Port Complex, kakumpitensya man sang merkado ang mga talipapa kag mga malls sa syudad sang Iloilo.
