Ginakabalak-an sang pila ka mga environmental advocate ang pag-revive ukon pagbangon sang Bataan Nuclear Power Plant kag ang plano nga pagdugang sa pagpatindug sang mga planta nga wala napaidalom sa maid-id nga pagtuon.
Nahibaluan nga gin-issue ni Presidente Rodrigo Duterte ang Executive Order (EO) No. 164 nga nagakonsiderar sang nuclear power bilang alternatibo nga kuhaan sang energy source sa pungsod.
Sa interview sang Bombo Radyo kay Engr. Melvin Purzuelo, Principal Coordinator sang Green Forum – Western Visayas, iya ginpahayag nga posible mangin problema man sang Pilipinas ang mga natabu sa pila ka mga planta sa iban nga pungsod ilabi na sa Ukraine.
Nahibaluan nga isa sa mga rason kun ngaa ginpaiway ang pag-operate sang planta sa Bataan amu ang pag-meltdown sang Chernobyl sa Ukraine sang 1986 sa diin bangud sadtu, nahibaluan nga malapit sa isa ka fault line ang Bataan Nuclear Power Plant.
Sa amu nga rason, ginkahangaw-an man kun masarangan bala sang cooling system sang Bataan Power Plant nga mapabugnaw ang fuel rod kag fuel reactor sang planta.
Suno pa kay Engr. Purzuelo, isa man ka problema sa pag-operate sang planta ang disposal sang waste ukon basura.
Nahibaluan nga ginabanta nagadangat sang 10,000 ka tuig kag madula ang radiation sa mga ginbasura nga fuel rods kag fuel reactors.
May yara man sang problema sa source sa ginagamit nga gatong sa pag-operate sang planta.
Dugang pa sang natungdan, ila ini nga awayon nga desisyon pinaagi sa economic consequences, sa diin apisar nga wala pa na-fully utilize ang mga available nga energy source sa pungsod, gina-insistar na ang mahal nga kuhaan sang power suplay.
