Makabig nga unlawful act ukon paglapas sa layi ang pag-sensationalize sang mga balita nga may ara sang sensitibo nga topiko ilabi na kun may ara sang involved nga menor de edad.
Kasunod ini sang eskandalo kun sa diin involved ang 17-anyos nga babaye kag 18-anyos lalaki, matapos ini nga nakuhaan sang video nga nagapakighilawas sa Esplande 11 nga sakop sang Barangay Progreso, Lapuz, Iloilo City.
Sa interview sang Bombo Radyo kay Atty. Jonald Dorado, iya ginpahayag nga kinahanglan nga nakay-o gid sang maayo ang pagplastar sang isa ka balita antes ini nga isapubliko.
Ginpakigbahin man niya nga kinahanglan nga mamintinar nga confidential ang mga detalye sang menor de edad kaangay sang pangalan kag address sang mga ini.
Suno sa iya, importante nga maprotektahan ang mga identidad sang mga kabataan nga naka-base man sa layi sa pungsod sang Pilipinas.
