Ginpaiway sang Department of Agriculture (DA) ang plano nga magpatuman sang suggested retail prices (SRP) para sa red kag white onions sa mga merkado sa pungsod.
Suno kay Agriculture Assistant Secretary Rex Estoperez, indi pa kumbinsido si Senior Undersecretary Domingo Panganiban sa cost structure nga gin-presentar kag kinahanglan pa tun-an sang dugang ang gasto sang mga mangunguma sa pagtanum sang bombay.
Matandaan nga sang nagligad nga semana, ginpahayag ni Estoperez nga ginakonsiderar sang ahensya ang pag-set sang SRP sa bombay kag ipatuman suno sa iya sa Mayo 22.
Magluwas diri, may plano man ang DA nga magpatumansang “cold storage price” ukon wholesale price nga P115 kada kilo para sa red onions kag P100 kada kilo para sa white onions. Ini agud nga mapanubo ang presyo sa P140 kada kilo sa red onions kag P150 kada kilo para naman sa white onions.
Apisar indi pa pag-ipatuman subong ang SRP, ginpahayag ni Estoperez nga magapadayon ang DA sa pag-monitor kag pag-inspect sang cold storage facilities. Tinguhaan man sang ahensya suno sa opisyal nga indi na maliwat ang natabo sang Enero nga wala man sang nagsunod sa SRP.
Ginalantaw man sang DA nga magpakig-angot sa iban nga mga ahensya para sa mas istrikto nga implementasyon sang SRP sa bombay pananglitan maaprubahan na ini sang ahensya. #
