Pag-terminate sang VFA, wala sang dako nga epekto sa Pilipinas suno sa Retired Major Gen.

Wala sang dako nga epekto sa Pilipinas ang pag terminate ukon pagdula ni Presidente Rodrigo Duterte sang Visiting Forces Agreement sa Estados Unidos.

Sa interview sang Bombo Radyo kay Retired Major General Romulo “Butch” Supapo, Vice Commander sang Philippine Army, iya ginpahayag nga padayon ang military exercises sang Pilipinas apisar nga wala na sang mga U.S military forces nga magapadulong sa pungsod.

Suno kay Supapo, sang aktibo pa siya sa Philippine Army na eksperyensyahan man niya ang Balikatan exercises kaupod ang mga U.S military forces sa diin nagahatag sila sang libre nga medical, logistic kag engineering training sa mga Filipino.

May yara man sang donasyon nga ginahatag ang U.S military forces sa Pilipinas kaangay sang mga armas kag iban pa nga gamit sa pagpakig-away.

Bangud sini, wala nagabayad sang buwis ang Estados Unidos sa mga equipment, U.S military aircraft kag vessel nga ginapasulod sa pungsod bangud nagahatag sila sang donasyon sa Pilpinas.

Apang paathag ni Supapo, ang tanan nga ginahatag sang Estados Unidos ang ila man nga gina-isip kag ginabuhin sa yearly allocation sa U.S budget.

Wala man sang ginalantaw si Supapo nga may yara sang may ma pirde sa tunga sang duha ka mga pungsod bangud indi lang ang Pilipinas ang may yara sang Visiting Forces Agreement sa Estados Unidos.