Ginatinguhaan sang Western Visayas Medical Center Sub-National Laboratory nga makaayo na ang problema kag mabalik sa normal ang pag-test sa mga specimen matapos nga wala na sang reagent ang automated extractor.
Sa interview sang Bombo Radyo kay Dr. Stephanie Abello, chief pathologist sang laboratoryo, iya ginpahayag nga may yara sang isa tubtob duha ka adlaw nga delay ang laboratoryo sa pagtest sang mga specimen bangud ang extraction machine ang manual nga gina-operate.
Apang subong nga adlaw, ginalaoman nga maabot na ang reagent.
Suno kay Abello, kun sadto, 48 hours lamang ang turn around time, apang sang sini nga semana nagdangat sa lima ka adlaw antes makapaguwa sang resulta ang laboratoryo.
Sa subong ang gina-test sang sub-national laboratory amo ang mga specimen nga nabaton sang Oktubre 12 samtang ang pending amo ang mga specimens sang Oktubre 13 kag 14.
Samtang naga-umpisa naman ang laboratoryo sa pagpatigayon sang pooled testing.
Pahayag ni Abello, may yara sang separado nga team nga naga-tutok sa pooled testing kag nagaguwa naman ang resulta 24 hrs tubtob 48 hrs.
Sa pooled testing, ang mga sample ang ginakolekta gikan sa numero sang mga tawo nga amo ang gina-test sa laboratoryo bilang grupo sa diin gina-impon ang mga swab sample sang pila ka mga persona.
Kun ang grupo ang ginabug-usan sang 10 ka tawo, ang mga sample ang i-separar sa duha ka grupo kun sa diin tag lima ka samples ang kada isa.
Sa tion nga magnegatibo ang resulta sang isa ka grupo, ang tanan ang kabigon nga negatibo apang kun magpositibo ang resulta, ang lima ka tawo sa grupo ang kinahanglan nga i-retest.
