ILOILO CITY – Nangin dako nga palaligban sa mga residente sang Barangay Botong, Badiangan, Iloilo ang pag-ulan sang ice sa ila lugar.
Sa exclusive interview sang Bombo Radyo kay Aileen Agabe Villonero, 29-anyos, manunudlo sa lugar, ginpahayag sini nga una ini nga kahigayunan nga nag-ulan sang ice sa ila lugar.
Una nga naggal-um sa ila lugar suno kay Villonero nga ginsundan sang pagpangilat kag nagbubo na ang madamo nga ice.
Suno pa sa manunudlo, nagdugay sang masobra isa ka oras ang pag-ulan sang ice.
Nagdumdum ini nga gin-giyera na sang bato ang ila balay bangud tuman kabaskog ang lagpok sa ila atop.
Sang nagguwa sa ila balay, nakumpirma sini nga indi tubig kundi ice ang nagtupa sa ila atop sa diin ila pa ini nga ginkuhaan sang laragway.
Paathag naman ni Raffy Tapales sang Philippine Atmospheric Geophysical and Astronomical Services Administration (PAGASA) Iloilo, ang hail ang isa ka sahi sang precipitation nga ginalakipan sang ice.
Ang hailstone ang masami nga may kadakuon kaangay sang monggo ukon inumol.
Suno kay Tapales, indi kinaandan ang pag-ulan sang ice sa Iloilo bangud mainit ang lugar kag ini ang masami nga nagakatabo sa mga mabugnaw nga pungsod kaangay sang Japan.