ILOILO CITY–‘Exempted’ sa election ban ang Pag-ulikid program ni Iloilo City Mayor Jose Espinosa III.
Ini ang panindugan ni Iloilo City Administrator Atty. Hernando Galvez tuhoy sa pahayag sang Commission on Elections (COMELEC) nga mahimo may paglapas sa Omnibus Election Code ang pagpatigayon sang nasambit nga programa kun wala sang Certificate of Exemption ang kampo sang alkalde.
Suno kay Atty. Galvez, ang Pag-ulikid program sang alkalde ang wala nalakip sa election ban.
Ini bangud nga suno kay Galvez, may election man ukon wala, padayon ang pagpatigayon sang Pag-ulikid program sa syudad sang Iloilo.
Sa pagpaathag naman ni COMELEC-6 Regional Director Atty. Jose Nick Mendros, ginadumili-an sa mga kandidato ukon political parties ang magpatigayon sang aktibidad nga mahimo malamuran sang pamulitika.
Mahimo lamang nga mapahanugutan sang COMELEC ang ka aktibidad kun may yara ini sang Certificate of Exemption.
Sa subong suno kay Mendros, indi pa sa gihapon matumod sang COMELEC en banc kun bala may yara sang Certificate of Exemption ang Pag-ulikid program ni Mayor Espinosa.
