ILOILO CITY – Ginpasiguro sang Department of Tourism (DoT) nga wala sang epekto sa rehabilitasyon sang isla sang Boracay ang pagbag-o sa liderato sa nasambit nga talatapan.
Kasunod ini sang pag-resign ni anay Secretary Wanda Tulfo-Teo bangud sa kontrobersiyal nga P60 million advertisement placement sang DoT sa PTV nga ginpahamtang sa programa sang Tulfo brothers nga utod sang anay tiglikom.
Sa interview sang Bombo Radyo Iloilo, ginpahayag ni Tourism Assistant Secretary Ricky Alegre nga welcome sa ahensiya ang madasig nga pag-appoint ni Presidente Rodrigo Duterte kay Agriculture Undersecretary Bernadette Romulo-Puyat bilang masunod nga tiglikom sang DoT.
Sa pihak sang kontrobersiya sa DoT, ginpahayag ni Alegre nga sa Biyernes ipaguwa na sang inter-agency task force ang una nga report may kaangtanan sa progreso sang rehabilitasyon nga ginahimo sa isla.
Samtang gin-ako ni Alegre nga nakabaton sila sang mga impormasyon sa mga tawo gikan sa Boracay ang sa likod sang pagpahalin kay Teo sa DoT.
Suno kay Asec. Alegre, moot and academic na ang isyu bangud sa pag-resign ni Secretary Teo.